انا مش هخاف المره دى..ضاع من عمرى سنين فى الخوف..!!
كاتب الموضوع
رسالة
alaa ayman Admin
عدد المساهمات : 2233 تاريخ التسجيل : 26/03/2012 العمر : 28 الموقع : www.alahli.alafdal.net
موضوع: انا مش هخاف المره دى..ضاع من عمرى سنين فى الخوف..!! الخميس يونيو 21, 2012 10:47 pm
انا مش هخاف المره دى..
ضاع من عمرى سنين فى الخوف..!!
مش هكون انسان عادى ..
انا هتحدى اى ظروف ..
يمكن الكلام اللى فوق ده من اغنيه ناس كتير تعرفها..
بس انهارده هنقوله بشكل مختلف ..
هنقوله واحنا قلوبنا بتصرخ راجعينلك يارب..
ازاى انا كنت خايف التزم كل الفتره اللى فاتت دى؟؟
انا مش هخاف المره دى !!
كتير مننا ، بفضل الله وعونه ، سمع عن ربنا ، وأتعرف على كرمه وعدله ولطفه بعباده ، وكمان عقابه وعذابه ، وقلوب كتير مننا متأثرة بالدين، ونفسها تلتزم بتعاليم ربنا وبمنهجه ، بس المشكلة فى ...خايف ألتزم..ودى كلمة فى لسان كتير مننا ، مع أختلاف الاسباب من شخص لأخر.
تعالوا نفتح قلوبنا لبعض ، ونقطع الاتصال بالدنيا ، علشان نساعد بعض للوصول بإذن الله تعالى لبر الامان ، فى المشهد الجميل ده ، اللهم لا تحرمنا أن نكون بينهم... قال تعالى
ياااااااه ، يالله ، قد أيه أنت كريم ، بتهدينا وتيسرلنا وكمان بتجازينا على أعمال ، جلالك وحده هو اللى يسرلنا ذلك..اللهم لك الحمد والشكر وبعدين لو بتقول إنك مش قدها ، طيب أمتى هتبقى قدها؟ واللى ألتزموا دول أحسن منك فى إيه؟؟؟ أنت مش نفسك يحبك ربنا ، أصل ربنا بيعطى الفلوس والعربيات والمناصب وغيرهم لمن يحب ومن لا يحب ، ولكن يعطى الهدايه لمن يحب فقط. اللهم أجعلنا ممن تحب وأهدنا لما تحب وأجعلنا من عبادك الصالحين.
أثبت وأحسن الظن فالله ، فاللى مع ربنا ، ربنا مش ممكن يسيبه ، يسيبك إزاى وهو معاك فى كل حته ،
قال تعالى ((وَهُوَ مَعَكُمْ أَيْنَ مَا كُنتُمْ وَاللَّهُ بِمَا تَعْمَلُونَ بَصير)) . وكل ما توسوس لك نفسك أو حد من أصحابك ويقلولك كلها يومين وترجع ، قول كما قال موسى عليه السلام
قال تعالى 62الشعراء((((قَالَ كَلَّا إِنَّ مَعِيَ رَبِّي سَيَهْدِينِ)))
هقولك أنت بتلتزم علشان ربنا ، مش عشان أصحابك ، وفين بقى ثقتك فى نفسك وأعتزازك بدينك ؟؟ لأن أصحابك اللى بيتريقوا دول مش بيعملوا حاجه صعبه ، أى حد يقدر يشرب مخدرات ويكلم بنات ويعمل كل الذنوب ، وكتير قبلهم عمل اللى بيعملوه ، يعنى هما مش بيخترعوا الذره ، لأن الشيطان بيساعدهم على كده ، لكن الهدايه دى والله شرف وعزة وكرم ليك من ربنا ، وأعرف إن أصحابك كلهم نفسهم يبقوا كويسين بس مش عارفين ومش عايزين مؤقتا ، وعلشان يرضوا ضميرهم يعدوا يتريقوا عليك ، علشان يحسسوا نفسهم إنهم اللى صح وانت اللى غلط ، وهما واثقين إنهم هما اللى غلط ، وبعدين كلها فترة وهتلاقيهم هما اللى بيقلولك متسبناش وخدنا فى طريقك ، وحط العبارة دى فى دماغك الملتزم فى مجتمعه شعاع نور إن لم يستطع الشيطان إطفائه سلط عليه أصحابه.
خليك راجل وعندك شخصيه وكون أنت القائد للخير ، ماحنا ياما كنا قواد فى الغلط ، اللهم أغفر لنا وأرحمنا ، وخلى شعارك كما قال شيخنا محمد حسن يعقوب ، بارك الله فيه وفى اهله ، أثر ولا تتأثر.
سبب غيره...بس برده صلى على النبى...
أنا خايف ألتزم لحسن تحصلى مشاكل وكده..!
فأحب أوصل إن فكرة الملتزمين إنهم جماعات وأرهاب ، الفكره دى بفضل الله تكاد أن تكون أنتهت ، وأنت مدام ماشى صح ، عمر ماهيصلك حاجه، وأعرف ان النافع والضار هو الله ، مش الناس ، صدقنى ممكن كتير من الناس أول ما تفكر إنك تلتزم يفضلوا ينصحوك إن كده غلط ويخوفوك ، فأعرف إن الناس دى مسلطهم الشيطان عليك ، وبقوا فى اللحظة دى من شياطين الانس، لأنك ممكن وأنت مش ملتزم ، تحصلك مشاكل كبيرة ومصايب ، أو ممكن تكون فى مكان ما ، وأنت فى معصيه ، ويشاء الله أن يكشف ستره ، ويتقبض عليك ، وساعتها هتكون مصيبه وفضيحه كمان ، يعنى مش الالتزام هو اللى هيجبلك مشاكل ، وكل شىء مكتوب ، وقدرك هتشوفه هتشوفه ، كما قال صلى الله عليه وسلم ((لا يؤمن عبد حتى يؤمن بالقدر خيره وشره ، حتى يعلم أن ما أصابه لم يكن ليخطئه ، وأن ما أخطأه لم يكن ليصيبه)) صدق رسول الله صلى الله عليه وسلم.
وعايزك تسمع الايات دى وتحطها حلقه فى ودانك، وأستشعر كل كلمه فيها.
فلو هتخاف ، يبقى تخاف من ربنا وبس ، هو الملك ، هو اللى بإيده ينتقم من أى أحد، هو المعز وهو المذل ، هو الذى أمره بين الكاف والنون ، فإذا قال كن فيكون ، فمن وجد الله فماذا فقد ومن فقد الله فماذا وجد؟؟؟
سبب تاني ...صلى على النبى أولا...
أنا خايف ألتزم علشان حاسس إن حياة الدين دى خنئه ..!
هقولك ربنا أتكلم عنك وعن كلمة خنئه ، اللى أنت بتقولها ، ومثلك بالذى يصعد الى السماء ، فكل ما يطلع يقل التنفس ، فيحس بالخنئه. حقيقة علميه (كلما ارتفع الإنسان في السماء انخفض الضغط الجوي وقلّت كمية الأكسجين مما يتسبب في حدوث ضيق في الصدر وصعوبة في التنفس)
فلو كنت شغلت عقلك وقولت لأ أكيد اللى هيبقى مع الملك ، مالك القلوب ، واللى وحده قادر ان يشعرها بالسعاده ، فكان هيشرح صدرك قال تعالى ((فَمَنْ يُرِدِ اللَّهُ أَنْ يَهدِيَهُ يَشْرَحْ صَدْرَهُ لِلإِسْلامِ وَمَنْ يُرِدْ أَنْ يُضِلَّهُ يَجْعَلْ صَدْرَهُ ضَيِّقًا حَرَجًا كَأَنَّمَا يَصَّعَّدُ فِي السَّمَاءِ))الأنعام: 125 ............. شغل عقلك وأحسبها صح ، فربنا قالك إن النساء والمال والدنيا مزينه فى قلبك ، وقلك برده ان اللى عنده أحسن وخير وأبقى. قال تعالى ((زُيِّنَ لِلنَّاسِ حُبُّ الشَّهَوَاتِ مِنَ النِّسَاء وَالْبَنِينَ وَالْقَنَاطِيرِ الْمُقَنطَرَةِ مِنَ الذَّهَبِ وَالْفِضَّةِ وَالْخَيْلِ الْمُسَوَّمَةِ وَالأَنْعَامِ وَالْحَرْثِ ذَلِكَ مَتَاعُ الْحَيَاةِ الدُّنْيَا وَاللّهُ عِندَهُ حُسْنُ الْمَآبِ ))آل عمران14
موضوع: انا مش هخاف المره دى..ضاع من عمرى سنين فى الخوف..!! 
الخميس يونيو 21, 2012 10:47 pm
