انفجرت أنبوبة ... شوف رحمة ربنا أد ايه ؟؟؟ قصة عشتها بنفسي في شهر رمضان
كاتب الموضوع
رسالة
alaa ayman Admin
عدد المساهمات : 2233 تاريخ التسجيل : 26/03/2012 العمر : 28 الموقع : www.alahli.alafdal.net
موضوع: انفجرت أنبوبة ... شوف رحمة ربنا أد ايه ؟؟؟ قصة عشتها بنفسي في شهر رمضان الأحد يونيو 17, 2012 2:04 pm
انفجرت أنبوبة شوف رحمة ربنا أد ايه ؟!
الحكاية دي حقيقية عشتها بنفسي في شهر رمضان اللي فات
والموضوع بتاعي يعني مش منقول
مش حطول عليكم ... نخش في المفيد
كنا بنصلي التراويح في المسجد وطبعا التراويح زي ما انتو عارفين ركعتين ركعتين وفي نص التراويح كده في الركعة الثانية الامام طول وفي عقل بالي بقول هو طول ليه كده
وبعدين الامام سجد وقلنا التشهد واول ما الامام قال السلام عليكم ورحمة الله وسلمنا بعد منه ..
فجأة ......... بووووووووووووووووووووووووووم
سمعنا فرقعة كبيرة أوي وكنا كتير بنصلي فاستغربنا أوي وكأننا كل واحد بقي بيستعمل حاسة واحدة هي حاسة السمع عشان نعرف في ايه
بعديها بثواني سمعنا صويت جامد .... فطلعنا تقريبا كلنا نجري بسرعة وكل واحد لبس حذاؤه وطلعنا نجري ناحية الصويت وفي ناس قعدت تكمل التراويح ...... حاجة سلبية جدا يعني الدنيا تخرب وانا اقعد اصلي في حالي وسنة كمان مش فرض ؟؟؟
المهم دخلنا في الشارع اللي بعد الجامع علي طول لقينا محل والع نار كله قايد نار متقدرش تشوف اي حاجة جواه من كتر ما النار مغطياه
كل شيء حصل بسرعة الدنيا اتقلبت نعمل ايه نعمل ايه ؟؟؟؟؟؟
حنطفي بايه ؟ لقينا الستات من البلكونات حدفولنا جرادل وكروانات عشان نملاها مية ؟؟؟؟ طيب حنملي مية منين ومين كان في المحل اللي والع ده وولع ازاي وايه اللي فرقع ؟؟؟ أسئلة كتير بتدور في مخ كل واحد في أقل من الثانية ؟؟؟
فبدأت الستات اللي ساكنين مقابل المحل اللي فيه الحريقة يحدفوا مية من البلكونات عليه لحد ما وصلنا لناس يملوا مية عشان ناخدها ونطفي بيها
فواحد اخد جردل فيه مياه و حدفه علي النار فاللي حصل غير المتوقع ان النار زادت وعليت اوي بسبب المياة وعملت صوت يخوف وشرر كتير
فقولنا عاوزين رملة مش حتنفع المياه لان دي أنبوبة اللي فرقعت في المحل والمياه مش حتطفي نار الغاز
طيب اي واحد بقي يقولي حنجيب رملة منين والشوارع كلها مسفلتة ........
أكيد حد في الوقت ده اتصل بالمطافي طبعا ... لأ أكيد كتير مش واحد بس ... لكننا عارفين المطافي عقبال ما تيجي بتاخد وقت طويل واحنا كمان في رمضان في وقت الزحمة اللي هو بعد العشاء المحلات بتفتح تاني واللي بينزل شغل ليه بالليل وغيره وغيره
هنا بقي رحمة ربنا عز وجل انه مش غافل عننا .... فصدق الله العظيم إذ يقول " فإن مع العسر يسرا , إن مع العسر يسرا " سورة الشرح
فمهما كانت المصيبة أو الكارثة كبيرة وشديدة بتلاقي حاجة بتحصل ربنا يهون بيها والا كانت الدنيا تهلك
المهم أكمل لكم حصل ايه ...
بنبص علي بعد أمتار من المحل اللي فيه الحريقة لقينا علي نفس الصف تقريبا كان في حد بيبني او بيصب في عمارة او حاجة زي كده فكان مجمع رملة كتير قدام البيت وفجأة الفرج جه كله مرة واحدة
فكل واحد مننا أخد جردل أو حلة أو ايا كان الاناء وبقي يملاه رملة واتعمل صفين تلاقي صف بيجري بالجرادل الفاضية يوديها للي بيعبوا رملة وصف ياخد الجرادل يوصلها للناس اللي قريبة من المحل عشان تطفي بيها النار
ده غير ان كان في شابين ماسكين كوريك عشان يعبوا الرملة للناس الجاية بالجرادل اللي فاضية وطبعا الفريق الأقرب للحريقة بياخد الجرادل ويحدف الرملة علي الحريقة من بعيد شوية من كتر النار
وستر ربنا ان المنطقة عندنا فيها غاز طبيعي ماعدا طبعا المحلات بتكتفي بانبوبة او علي حسب الاحتياج زي المحل ده كده
طبعا المشهد كان مأساوي جدا وجميل جدا في نفس الوقت ماساوي طبعا عشان اكل عيش الناس اللي راح ده وقدر الله وماشاء فعل كله بأمر ربنا وجميل لاني شفت وعشت فيه النظام والتعاون والروح الجميلة بين الناس
وبفضل الله ..... طفيناها
ولما سألت الناس كان في حد جوا المحل ؟قالوا الحمد لله مكنش صاحبه جواه ساعتها وفي الآخر طبعا سمعنا صوت جديد تتخيلوا ايه الذكي حيعرف بسرعة
ويوا ويوا ويوا ويوا ويوا ويوا ويوا
ههههههههههههههههههههه
المطافي جت و ضخت المحل بالمياه عشان تتاكد ان مفيش أثار للنار
استنوا لسة مخلصناش
فشفت واحد تقريبا كان هو صاحب المحل اللي انا لحد دلوقتي مشعارف هو كان محل ايه بقال ولا خردواتي ولا حداد ولا ايه لانه كل ملامحه اختفت بسبب الحريقة
المهم صاحب المحل ده لقيته بقي بيزعق وبيتكلم تقريبا علي واحد معين انه حدف صاروخ جوا المحل المهم الكلام زاد والجعجعة كترت وقامت خناقة بسبب ان تقريبا في حد حدف صاروخ جوا المحل وهو اللي عمل كده هنا بقي الناس بدأت تخلص والكلام ده كله ... وهنا انتهي دوري في القصة ورجعت ألحق الشفع والوتر في المسجد
الحمد لله ان ربنا جعلني واحد من الناس اللي ساعدوا في اطفاء الحريقة دي لك الحمد والشكر يارب بس كنت عاوز ألفت انتباهكم لحاجات فهمتها وعشان كده عملت الموضوع بالقسم الاسلامي وشوفوا بقي الهدف من القصة دي هي رحمة ربنا بينا
اول حاجة ان الحكاية دي حصلت اثناء صلاة التراويح كان ممكن ربنا يجعلها ساعة الفطار وكلنا مشغولين في بيوتنا وساعتها ؟؟؟؟؟
ثاني حاجة الامام طول في الصلاة وأول ما سلمنا , الأنبوبة فرقعت فالناس كلها تقريبا طلعت تجري تساعد كان ممكن الأنبوبة تفرقع في وسط الصلاة ومننتبهش من صوت الامام ومنعرفش غير متأخر أو كان ممكن تفرقع أثناء صلاة العشاء وكنا مش حنعرف نخرج لان كان الكتير مننا حيتردد يسيب الفرض ولالا وبالتالي ؟؟؟
ثالث حاجة طبعا انتم عارفينها لما لقينا كوم الرملة في وقت النار فيه كانت أشد ما يكون ولولا ان ربنا جعلها في المكان القريب ده ؟؟؟؟؟؟؟
رابع حاجة وأهم حاجة : ان المحل مكنش فيه حد ساعتها وغير كده كان زمانه ... بلاش أقول بقي
فعلا والله شوف قول ربنا عز وجل , يقول تعالي : " ورحمتي وسعت كل شيء " (سورة الأعراف) فربنا كان رحيم بصاحب المحل وبينا لان كان ممكن أي واحد تاني كمان يكون عنده ساعتها
المهم اللي استفدته ايه واتمني تستفادوا بيه
رحمة ربنا سبقت غضبه ان مع العسر يسراً ... مهما كانت عندك مشكلة فربنا رحيم وخليك علي يقين بده الصبر .... عند اطالة الامام في الصلاة وفي أي حاجة عموما الايجابية ... ازاي واحد محتاج مساعدة وانت تسيبه وتقعد تتعبد لله هو الدين صلاة وبس اوعي تكون سلبي
يعني لو انا رايح اصلي العشاء مثلا وواحدة أو واحد وقع جمبي او اتعور او استنجد بيا أقوله معرفكش ده انا رايح اصلي فرض ربنا اولا حيكرهك طبعا ثانيا حيكره المتدينين وممكن ميروحش المسجد بعد كده خالص !
أو مثلا ساعة الحريقة أسيب المصيبة دي وأطلع الموبايل عشان أصورها !
موضوع: انفجرت أنبوبة ... شوف رحمة ربنا أد ايه ؟؟؟ قصة عشتها بنفسي في شهر رمضان 
الأحد يونيو 17, 2012 2:04 pm
